ਪੰਜਾਬੀ ਗਾਇਕ ਨਛੱਤਰ ਗਿੱਲ ਵਿਰੁੱਧ ਬਲਾਤਕਾਰ ਦਾ ਮਾਮਲਾ ਦਰਜ

 

ਲੁਧਿਆਣਾ—ਪੰਜਾਬ ਦੇ ਚਰਚਿਤ ਗਾਇਕ ਨਛੱਤਰ ਗਿੱਲ ਦੇ ਖਿਲਾਫ ਲੁਧਿਆਣਾ ਦੀ ਪੁਲਸ ਵੱਲੋਂ ਬਲਾਤਕਾਰ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ। ਇਸ ਸੰਬੰਧ 'ਚ ਕੁੱਝ ਸਮਾਂ ਪਹਿਲਾਂ ਲੁਧਿਆਣਾ ਦੀ ਇਕ ਲੜਕੀ ਨੇ ਨਛੱਤਰ ਗਿੱਲ ਵਿਰੁੱਧ ਦੋਸ਼ ਲਗਾਇਆ ਸੀ ਕਿ ਉਸ ਨੇ ਫਿਲਮਾਂ ਅਤੇ ਸੰਗੀਤ ਵੀਡੀਓ 'ਚ ਕੰਮ ਦੇਣ ਦੇ ਬਹਾਨੇ ਉਸ ਨਾਲ ਬਲਾਤਕਾਰ ਕੀਤਾ। ਲੜਕੀ ਵੱਲੋਂ ਇਹ ਵੀ ਦੋਸ਼ ਲਾਇਆ ਗਿਆ ਹੈ ਕਿ ਦੋਸ਼ੀ ਵੱਲੋਂ ਉਸ ਦੇ ਕੁੱਝ ਇਤਰਾਜ਼ਯੋਗ ਵੀਡੀਓ ਵੀ ਬਣਾਏ ਗਏ। ਪੁਲਸ ਨੇ ਇਸ ਸਾਰੇ ਮਾਮਲੇ ਦੀ ਜਾਂਚ-ਪੜਤਾਲ ਕਰਨ ਉਪਰੰਤ ਨਛੱਤਰ ਗਿੱਲ ਦੇ ਵਿਰੁੱਧ ਧਾਰਾ 376, 420, 506 ਅਤੇ 66ਈ ਤੋਂ ਇਲਾਵਾ ਸੂਚਨਾ ਤਕਨਾਲੋਜੀ ਦੇ ਐਕਟ 67ਏ ਅਧੀਨ ਮਾਮਲਾ ਦਰਜ ਕੀਤਾ ਹੈ।
ਜ਼ਿਕਰਯੋਗ ਹੈ ਕਿ ਜਦੋਂ ਇਸ ਮਾਮਲੇ 'ਚ ਕੁੜੀ ਵੱਲੋਂ ਸ਼ਿਕਾਇਤ ਕੀਤੀ ਗਈ ਸੀ ਤਾਂ ਪੁਲਸ ਨੇ ਉਸ ਕੋਲੋਂ ਡੂੰਘੀ ਪੁੱਛ-ਪੜਤਾਲ ਕੀਤੀ। ਉਸ ਵੇਲੇ ਪੁਲਸ ਵੱਲੋਂ ਨਛੱਤਰ ਗਿੱਲ ਨੂੰ ਤਲਬ ਕੀਤਾ ਗਿਆ ਸੀ ਅਤੇ ਲੁਧਿਆਣਾ ਦੇ ਸੀਨੀਅਰ ਪੁਲਸ ਅਫਸਰਾਂ ਨੇ ਉਸ ਕੋਲੋਂ ਪੁੱਛਗਿੱਛ ਵੀ ਕੀਤੀ। ਇਸ ਦੌਰਾਨ ਨਛੱਤਰ ਗਿੱਲ ਪੁਲਸ ਥਾਣੇ ਦੀ ਕੰਧ ਟੱਪ ਕੇ ਮੀਡੀਆ ਤੋਂ ਨਜ਼ਰ ਬਚਾਉਂਦਾ ਭੱਜ ਗਿਆ ਸੀ। ਨਛੱਤਰ ਗਿੱਲ ਦੀ ਇਹ ਹਰਕਤ ਮੀਡੀਆਂ 'ਚ ਸੁਰਖੀ ਵੀ ਬਣੀ ਸੀ। ਹੁਣ ਗਿੱਲ ਖਿਲਾਫ ਬਲਾਤਕਾਰ ਦਾ ਮਾਮਲਾ ਦਰਜ ਹੋਣ ਤੋਂ ਬਾਅਦ ਉਸ ਦੀਆਂ ਮੁਸ਼ਕਲਾਂ ਵਧ ਗਈਆਂ ਹਨ।