ਐਂਜਲੀਨਾ ਨੇ ਆਪਣੇ ਸਤਨ ਹਟਵਾਏ

ਨਿਊਯਾਰਕ, 14 ਮਈ (ਬਿਊਰੋ) - ਹਾਲੀਵੁਡ ਦੀ ਮਸ਼ਹੂਰ ਐਕਟਰੈਸ ਐਂਜਲੀਨਾ ਜਾਲੀ ਨੇ ਨਿਊਯਾਰਕ ਟਾਈਮਸ ਵਿੱਚ ਲਿਖੇ ਇਕ ਲੇਖ ਵਿਚ ਕੈਂਸਰ ਦੇ ਜੋਖਮ ਦੀ ਗੱਲ ਦੁਨੀਆ ਸਾਹਮਣੇ ਬਿਆਨ ਕੀਤੀ ਹੈ। 37 ਸਾਲਾ ਐਂਜਲੀਨਾ ਨੇ ਸਤਨ ਕੈਂਸਰ ਤੋਂ ਬਚਣ ਲਈ ਇੱਕ ਆਪਰੇਸ਼ਨ ਕਰਾਇਆ ਹੈ। ਉਨ੍ਹਾਂ ਨੇ ਇਕ ਆਪ੍ਰੇਸ਼ਨ ਕਰਵਾਇਆ ਹੈ ਜਿਸ ਵਿਚ ਸਤਨ ਕੈਂਸਰ ਤੋਂ ਬਚਣ ਲਈ ਦੋਵੇਂ ਸਤਨਾਂ ਨੂੰ ਥੋੜਾ ਜਾਂ ਫਿਰ ਬਿਲਕੁਲ ਹੀ ਹਟਾ ਦਿੱਤਾ ਜਾਂਦਾ ਹੈ। ਐਂਜਲੀਨਾ ਨੇ ਦੱਸਿਆ ਹੈ ਕਿ, ਉਨ੍ਹਾਂ ਦੇ ਡਾਕਟਰਾਂ ਦਾ ਅਨੁਮਾਨ ਹੈ ਕਿ ਉਨ੍ਹਾਂ ਨੂੰ ਸਤਨ ਕੈਂਸਰ ਹੋਣ ਦਾ ਜੋਖਮ 87 ਫ਼ੀਸਦੀ ਅਤੇ ਅੰਡਕੋਸ਼ ਕੈਂਸਰ ਹੋਣ ਦਾ ਜੋਖਮ 50 ਫ਼ੀਸਦੀ ਹੈ। ਮਾਈ ਮੈਡੀਕਲ ਚਾਇਸ ਸਿਰਲੇਖ ਹੇਠ ਲਿਖੇ ਲੇਖ ਵਿੱਚ ਐਂਜਲੀਨਾ ਨੇ ਦੱਸਿਆ ਕਿ, ਉਨ੍ਹਾਂ ਦੀ ਮਾਂ ਲੱਗਭੱਗ ਇੱਕ ਦਸ਼ਕ ਤੱਕ ਕੈਂਸਰ ਨਾਲ ਲੜਦੀ ਰਹੀ ਅਤੇ 56 ਸਾਲ ਦੀ ਉਮਰ ਵਿੱਚ ਇਸ ਰੋਗ ਕਾਰਨ ਉਨ੍ਹਾਂ ਦੀ ਮੌਤ ਹੋ ਗਈ। ਐਂਜਲੀਨਾ ਨਹੀਂ ਚਾਹੁੰਦੀ ਕਿ ਉਸਦੇ ਆਪਣੇ ਬੱਚੇ ਵੀ ਆਪਣੀ ਮਾਂ ਨੂੰ ਇਸ ਬਿਮਾਰੀ ਕਾਰਨ ਗੁਆ ਲੈਣ। ਉਨ੍ਹਾਂ ਨੇ ਦੱਸਿਆ ਕਿ, ਇਹ ਸੱਚਾਈ ਹੈ ਕਿ ਮੇਰੇ ਸਰੀਰ ਵਿੱਚ ਇੱਕ ਖ਼ਰਾਬ ਜੀਨ ਬੀਆਰਸੀਏ1 ਹੈ ਜੋ ਸਤਨ ਕੈਂਸਰ ਜਾਂ ਅੰਡਕੋਸ਼ ਕੈਂਸਰ ਦੇ ਖਤਰੇ ਨੂੰ ਬਹੁਤ ਵਧਾ ਦਿੰਦਾ ਹੈ। ਇੱਕ ਵਾਰ ਜਦੋਂ ਮੈਨੂੰ ਇਸ ਸੱਚਾਈ ਦੇ ਬਾਰੇ ਵਿੱਚ ਪਤਾ ਲੱਗਿਆ ਤਾਂ ਮੈਂ ਡਬਲ ਮਾਸਟੇਕਟਾਮੀ ਦੀ ਨੌਂ ਹਫਤਿਆਂ ਤੱਕ ਚਲਣ ਵਾਲੀ ਪ੍ਰਕਿਰਿਆ ਵਿਚੋਂ ਗੁਜਰਨ ਦਾ ਫੈਸਲਾ ਕੀਤਾ। ਐਂਜਲੀਨਾ ਦੇ ਅਨੁਸਾਰ ਡਬਲ ਮਾਸਟੇਕਟਾਮੀ ਕਰਾਉਣ ਦੇ ਬਾਅਦ ਉਨ੍ਹਾਂ ਨੂੰ ਕੈਂਸਰ ਹੋਣ ਦਾ ਜੋਖਮ 87 ਫ਼ੀਸਦੀ ਤੋਂ ਘੱਟ ਕੇ 5 ਫ਼ੀਸਦੀ ਰਹਿ ਗਿਆ ਹੈ। ਉਨ੍ਹਾਂ ਨੇ ਇਸ ਸਭ ਲਈ ਪਿਆਰ ਅਤੇ ਸਮਰਥਨ ਲਈ ਆਪਣੇ ਪਾਰਟਨਰ ਬਰੈਡ ਪਿਟ ਦੀ ਤਾਰੀਫ ਕੀਤੀ। ਉਨ੍ਹਾਂ ਦਾ ਕਹਿਣਾ ਹੈ ਕਿ, ਮੈਂ ਆਪਣੇ ਆਪ ਨੂੰ ਮਜਬੂਤ ਮਹਿਸੂਸ ਕਰ ਰਹੀ ਹਾਂ ਕਿ ਮੈਂ ਇਹ ਫੈਸਲਾ ਲਿਆ ਅਤੇ ਇਸ ਨਾਲ ਮੇਰੇ ਮਹਿਲਾ ਹੋਣ ਪ੍ਰਤੀ ਵਿਸ਼ਵਾਸ ਵਿਚ ਕਿਸੇ ਤਰ੍ਹਾਂ ਦੀ ਕਮੀ ਨਹੀਂ ਆਈ ਹੈ। ਉਹ ਕਹਿੰਦੀ ਹੈ ਕਿ, ਜੋ ਵੀ ਮਹਿਲਾ ਖਾਸ ਕਰ ਕੇ ਜਿਸਦੇ ਪਰਿਵਾਰ ਵਿਚ ਸਤਨ ਕੈਂਸਰ ਦਾ ਇਤਿਹਾਸ ਹੈ ਇਸ ਬਾਰੇ ਪੜ੍ਹੇਗੀ ਜਾਂ ਸੁਣੇਗੀ ਮੈਨੂੰ ਉਂਮੀਦ ਹੈ ਕਿ ਉਸਨੂੰ ਪਤਾ ਚੱਲੇਗਾ ਕਿ ਉਸਦੇ ਕੋਲ ਕੈਂਸਰ ਤੋਂ ਬਚਣ ਦਾ ਬਦਲ ਹੈ।

www.sabblok.blogspot.com