www.sabblok.blogspot.com
ਨਵੀਂ ਦਿੱਲੀ- ਰਾਸ਼ਟਰੀ ਸੰਕਟ ਪ੍ਰਤੀਕਿਰਿਆ ਫੋਰਸ ਨੇ ਐਤਵਾਰ ਨੂੰ ਕਿਹਾ ਕਿ ਓੜੀਸਾ ਦੇ ਤੱਟ ‘ਤੇ ਆਏ ਚੱਕਰਵਾਤ ‘ਫੈਲਿਨ’ ਕਾਰਨ ਹੁਣ ਤੱਕ ਕੋਈ ਵੱਡਾ ਨੁਕਸਾਨ ਹੋਣ ਦੀ ਖਬਰ ਨਹੀਂ ਹੈ। ਐਨ. ਡੀ. ਆਰ. ਐਫ. ਦੇ ਮੁਖੀ ਕ੍ਰਿਸ਼ਨ ਚੌਧਰੀ ਨੇ ਇਥੇ ਪ੍ਰੈਸ ਟਰੱਸਟ ਨੂੰ ਦੱਸਿਆ ਕਿ ਬਚਾਅ ਅਤੇ ਰਾਹਤ ਮੁਹਿੰਮਾਂ ਲਈ ਓੜੀਸਾ ਅਤੇ ਆਂਧਰ ਪ੍ਰਦੇਸ਼ ‘ਚ ਸਾਡੇ ਦਲ ਮੌਜੂਦ ਹਨ। ਹੁਣ ਤੱਕ ਸਾਨੂੰ ਕਿਤੋਂ ਵੀ ਕਿਸੇ ਤਰ੍ਹਾਂ ਦੇ ਵੱਡੇ ਨੁਕਸਾਨ ਦੀ ਖਬਰ ਨਹੀਂ ਮਿਲੀ ਹੈ। ਦੋਹਾਂ ਰਾਜਾਂ ‘ਚ ਐਨ. ਡੀ. ਆਰ. ਐਫ. ਦੇ 3000 ਤੋਂ ਵੱਧ ਕਰਮਚਾਰੀ ਤਾਇਨਾਤ ਕੀਤੇ ਗਏ ਹਨ ਨਾਲ ਹੀ ਮਲਬੇ ‘ਚ ਫਸੇ ਲੋਕਾਂ ਨੂੰ ਬਚਾਉਣ ਦੀ ਕੋਸ਼ਿਸ਼ ਜਾਰੀ ਹੈ। ਚੌਧਰੀ ਨੇ ਦੱਸਿਆ ਕਿ ਆਂਧਰ ਪ੍ਰਦੇਸ਼ ਤੋਂ ਦੋ ਖਬਰਾਂ ਮਿਲੀਆਂ ਹਨ ਕਿ ਕੁਝ ਲੋਕ ਕਿਤੇ ਫਸ ਗਏ ਹਨ ਉਨ੍ਹਾਂ ਨੂੰ ਬਚਾਉਣ ਲਈ ਐਨ. ਡੀ. ਆਰ. ਐਫ. ਦੇ ਦਲ ਮੌਕੇ ‘ਤੇ ਭੇਜੇ ਗਏ ਹਨ। ਐਨ. ਡੀ. ਆਰ. ਐਫ. ਮੁਖੀ ਨੇ ਦੱਸਿਆ ਕਿ ਸ਼ੁਰੂਆਤੀ ਖਬਰਾਂ ‘ਚ ਕਿਹਾ ਗਿਆ ਹੈ ਕਿ ਚੱਕਰਵਾਤ ਦੇ ਪ੍ਰਭਾਵ ਦੇ ਚਲਦੇ ਕੁਝ ਇਮਾਰਤਾਂ ਅਤੇ ਕੁਝ ਸੰਚਾਰ ਟਾਵਰ ਤਬਾਹ ਹੋ ਗਏ ਹਨ। ਚੌਧਰੀ ਨੇ ਦੱਸਿਆ ਕਿ ਕਲ ਓੜੀਸਾ ‘ਚ ਇਕ ਇਮਾਰਤ ਦੇ ਢਹਿ ਢੇਰੀ ਹੋਣ ਨਾਲ ਪੰਜ ਲੋਕਾਂ ਦੀ ਮੌਤ ਹੋ ਗਈ ਪਰ ਇਹ ਹਾਦਸਾ ਚੱਕਰਵਾਤ ਦੇ ਆਉਣ ਤੋਂ ਪਹਿਲਾਂ ਹੋਇਆ। ਸ਼ਕਤੀਸ਼ਾਲੀ ਚੱਕਰਵਾਤ ਫੈਲਿਨ ਸਾਲ 1999 ‘ਚ ਆਏ ਵਿਨਾਸ਼ਕਾਰੀ ਚੱਕਰਵਾਤ ਤੋਂ ਵੀ ਜ਼ਿਆਦਾ ਭਿਆਨਕ ਹੈ। ਓੜੀਸਾ ਦੇ ਤੱਟ ‘ਤੇ ਬੀਤੀ ਰਾਤ ਆਏ ਇਸ ਚੱਕਰਵਾਤ ਕਾਰਨ ਸੂਬੇ ‘ਚ ਅਤੇ ਨੇੜਲੇ ਉੱਤਰੀ ਤਟੀ ਆਂਧਰ ਪ੍ਰਦੇਸ਼ ‘ਚ ਮੂਸਲਾਧਾਰ ਬਾਰਿਸ਼ ਹੋਈ ਅਤੇ 200 ਕਿ. ਮੀਟਰ ਪ੍ਰਤੀ ਘੰਟੇ ਤੋਂ ਵੱਧ ਰਫਤਾਰ ਨਾਲ ਹਵਾਵਾਂ ਚੱਲੀਆਂ। ਚੱਕਰਵਾਤ ਨਾਲ ਓੜੀਸਾ ਦੇ ਤਟੀ ਜ਼ਿਲੇ ਦਾ ਗੋਪਾਲਪੁਰ ਸਭ ਤੋਂ ਵੱਧ ਪ੍ਰਭਾਵਿਤ ਹੋਇਆ। ਸੂਬੇ ਦੇ ਸਭ ਤਟੀ ਜ਼ਿਲੇ, ਖਾਸ ਕਰਕੇ ਗੰਜਾਮ ‘ਚ ਪੂਰੀ ਤਰ੍ਹਾਂ ਹਨੇਰਾ ਹੋਇਆ ਸੀ ਕਿਉਂਕਿ ਚੱਕਰਵਾਤ ਕਾਰਨ ਥਾਂ-ਥਾਂ ਰੁੱਖ ਅਤੇ ਬਿਜਲੀ ਦੇ ਖੰਭੇ ਟੁੱਟ ਕੇ ਡਿੱਗ ਗਏ। ਸਹਿਮੇ ਲੋਕਾਂ ਨੂੰ ਤੇਜ਼ ਬਾਰਿਸ਼ ਕਾਰਨ ਘਰਾਂ ਅੰਦਰ ਹੀ ਰਹਿਣਾ ਪਿਆ ਅਤੇ ਥਾਂ-ਥਾਂ ਆਵਾਜਾਈ ਵੀ ਪ੍ਰਭਾਵਿਤ ਹੋਈ। ਪ੍ਰਸ਼ਾਸਨ ਨੇ ਓੜੀਸਾ ਅਤੇ ਆਂਧਰ ਪ੍ਰਦੇਸ਼ ਦੇ ਸੰਵੇਦਨਸ਼ੀਲ ਇਲਾਕਿਆਂ ‘ਚ 5 ਲੱਖ ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ।
No comments:
Post a Comment