ਕਾਂਗਰਸ ਸਰਕਾਰ ਆਉਣ ‘ਤੇ ਪ੍ਰਾਪਰਟੀ ਟੈਕਸ ਮੁਆਫ ਕਰ ਦੇਵਾਂਗੇ : ਬਾਜਵਾ

www.sabblok.blogspot.com

* ਪੰਜਾਬ ਦੀ ਜਨਤਾ ਨੂੰ ਜਜ਼ੀਆ ਜਮ੍ਹਾ ਨਾ ਕਰਾਉਣ ਲਈ ਕਿਹਾ

* ਬੀ. ਜੇ. ਪੀ. ਨੇ ਆਪਣੇ-ਆਪ ਨੂੰ ਅਕਾਲੀ ਦਲ ਕੋਲ ਗਿਰਵੀ ਰੱਖਿਆ

 

ਜਲੰਧਰ, (ਵੀਰੇਂਦਰ)¸ ਪੰਜਾਬ ਕਾਂਗਰਸ ਪ੍ਰਧਾਨ ਪ੍ਰਤਾਪ ਸਿੰਘ ਬਾਜਵਾ ਨੇ ਪੰਜਾਬ ਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਅਣਅਧਿਕਾਰਤ ਕਾਲੋਨੀਆਂ ਨੂੰ ਲੀਗਲ ਕਰਨ ਵਾਸਤੇ ਪੰਜਾਬ ਸਰਕਾਰ ਵਲੋਂ ਵਸੂਲੇ ਜਾਣ ਵਾਲੇ ਜਜ਼ੀਏ ਅਤੇ ਪ੍ਰਾਪਰਟੀ ਟੈਕਸ ਨੂੰ ਜਮ੍ਹਾ ਨਾ ਕਰਾਉਣ। ਬਾਜਵਾ ਨੇ ਇਨ੍ਹਾਂ ਟੈਕਸਾਂ ਨੂੰ ਗੈਰ ਕਾਨੂੰਨੀ ਦੱਸਦੇ ਹੋਏ ਇਨ੍ਹਾਂ ਟੈਕਸਾਂ ਦੀ ਤੁਲਨਾ ਔਰਗਜ਼ੇਬ ਵਲੋਂ ਲਗਾਏ ਗਏ ਉਸ ਜਜ਼ੀਏ ਨਾਲ ਕੀਤੀ ਹੈ ਜਿਸ ਨੇ ਉਸ ਵੇਲੇ ਦੇ ਵਪਾਰੀ ਵਰਗ ਨੂੰ ਤਬਾਹ ਕਰਕੇ ਰੱਖ ਦਿੱਤਾ ਸੀ। ਉਨ੍ਹਾਂ ਪ੍ਰਦੇਸ਼ ਦੀ ਜਨਤਾ ਨੂੰ ਕਿਹਾ  ਕਿ ਸਿਰਫ ਤਿੰਨ ਸਾਲਾਂ ਬਾਅਦ ਪੰਜਾਬ ‘ਚ ਕਾਂਗਰਸ ਦੀ ਸਰਕਾਰ ਆਉਣ ਵਾਲੀ ਹੈ ਅਤੇ ਸਾਡੀ ਸਰਕਾਰ ਦੇ ਆਉਂਦਿਆਂ ਹੀ ਅਸੀਂ ਇਹ ਟੈਕਸ ਮੁਆਫ ਕਰ ਦਿਆਂਗੇ। ਸ. ਬਾਜਵਾ ਨੇ ਭਾਰਤੀ ਜਨਤਾ ਪਾਰਟੀ ਨੂੰ ਘੇਰਦੇ ਹੋਏ ਕਿਹਾ ਕਿ ਬੀ. ਜੇ. ਪੀ. ਦੇ ਮੰਤਰੀਆਂ ਅਤੇ ਇਨ੍ਹਾਂ ਦੀ ਹਾਈਕਮਾਨ ਨੇ ਆਪਣੇ-ਆਪ ਨੂੰ  ਅਕਾਲੀ ਦਲ ਕੋਲ ਗਿਰਵੀ ਰੱਖ ਦਿੱਤਾ ਹੈ ਅਤੇ ਇਨ੍ਹਾਂ ਨੂੰ ਸ਼ਹਿਰੀ ਵਰਗ ਦੀ ਹੋ ਰਹੀ ਦੁਰਗਤੀ ਦੀ ਕੋਈ ਚਿੰਤਾ ਨਹੀਂ ਹੈ। ਅਕਾਲੀ ਦਲ ਦੇ ਨਾਅਰੇ ”ਰਾਜ ਨਹੀਂ ਸੇਵਾ” ਦਾ  ਮਜ਼ਾਕ  ਉਡਾਉਂਦੇ ਹੋਏ ਬਾਜਵਾ ਨੇ ਕਿਹਾ ਕਿ ਪੰਜਾਬ ਦੀ ਜਨਤਾ ਨੂੰ ਹੁਣ ਸਮਝ ਆਇਆ ਕਿ ਅਸਲ ‘ਚ ‘ਸੇਵਾ’ ਕਿਸ ਨੂੰ  ਆਖਦੇ  ਹਨ। ਪ੍ਰਾਪਰਟੀ ਟੈਕਸ, ਮਹਿੰਗੀ ਬਿਜਲੀ, ਵੈਟ ਰਿਫੰਡ ‘ਚ ਵਾਅਦਾ ਖਿਲਾਫੀ, ਈ-ਟ੍ਰਿਪ ਕਾਲੋਨੀਆਂ ਨੂੰ ਰੈਗੂਲਰ ਕਰਨ ਦੇ ਨਾਂ ‘ਤੇ ਜਬਰੀ ਵਸੂਲੀ ਅਤੇ ਹੁਣ ਐਡਵਾਂਸ ਟੈਕਸ। ਜੇ ਇਹ ਸੇਵਾ ਹੈ ਤਾਂ ਫਿਰ ਰਾਜ ਕਿਸ ਨੂੰ ਆਖਦੇ ਹਨ?

ਬਾਜਵਾ ਨੇ ਕਿਹਾ ਹੈ ਕਿ ਨਾਜਾਇਜ਼ ਕਾਲੋਨੀਆਂ ਦੇ ਨਿਰਮਾਣ ਲਈ ਸਰਕਾਰ ਅਤੇ ਸਰਕਾਰ ਦੇ ਅਫਸਰ ਹੀ ਜ਼ਿੰਮੇਵਾਰ ਹਨ। ਇਸ ਲਈ ਜੇ ਕਿਸੇ ਨੂੰ ਸਜ਼ਾ ਮਿਲਣੀ ਚਾਹੀਦੀ ਹੈ ਤਾਂ ਉਹ ਸਰਕਾਰ ਨੂੰ ਜਾਂ ਸਰਕਾਰੀ ਅਫਸਰਾਂ ਨੂੰ ਮਿਲਣੀ ਚਾਹੀਦੀ ਹੈ। ਆਮ ਜਨਤਾ ਨੂੰ ਨਹੀਂ। ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਨੇ ਕਿਹਾ ਕਿ ਬਾਦਲ ਸਰਕਾਰ ਸੂਬੇ ਦੀ ਜਨਤਾ ਨੂੰ ਡਰਾ-ਧਮਕਾ ਰਹੀ ਹੈ ਕਿ ਜੇਕਰ ਮਿਥੇ ਸਮੇਂ ਤਕ ਟੈਕਸ ਜਮ੍ਹਾ ਨਾ ਕਰਵਾਇਆ ਗਿਆ ਤਾਂ ਲੋਕਾਂ ਦੇ ਖਿਲਾਫ ਕਾਨੂੰਨੀ  ਕਾਰਵਾਈ  ਕੀਤੀ ਜਾਵੇਗੀ ਅਤੇ ਮੁਕੱਦਮੇ ਬਣਾਏ ਜਾਣਗੇ। ਬਾਜਵਾ ਨੇ ਕਿਹਾ ਕਿ ਬੇਅੰਤ ਸਰਕਾਰ ਨੇ 1995 ਤੋਂ ਪਹਿਲਾਂ  ਬਣੀਆਂ ਸਭ ਕਾਲੋਨੀਆਂ ਰੈਗੂਲਰ ਕਰ ਦਿੱਤੀਆਂ ਸਨ ਪਰ ਇਹ ਸਰਕਾਰ  ਉਸ ਤੋਂ ਪਹਿਲਾਂ ਬਣੀਆਂ ਕਾਲੋਨੀਆਂ ‘ਤੇ ਵੀ ਟੈਕਸ ਲਗਾ ਰਹੀ ਹੈ ਜੋ ਕਿ ਸਰਾਸਰ ਨਾ-ਇਨਸਾਫੀ ਹੈ। ਉਨ੍ਹਾਂ ਕਿਹਾ ਕਿ ਪੁਰਾਣੀਆਂ ਕਾਲੋਨੀਆਂ ‘ਚ ਰਹਿ ਰਹੇ 90 ਫੀਸਦੀ ਲੋਕਾਂ ਨੂੰ ਐੈੱਨ.ਓ. ਸੀ. ਦੀ ਲੋੜ ਹੀ ਨਹੀਂ ਹੈ ਕਿਉਂਕਿ ਉਨ੍ਹਾਂ ਕੋਲ ਬਿਜਲੀ, ਪਾਣੀ ਆਦਿ ਦੇ ਕੁਨੈਕਸ਼ਨ ਵੀ ਹਨ ਅਤੇ ਨਕਸ਼ੇ ਵੀ ਪਾਸ ਹਨ।
ਜਿਨ੍ਹਾਂ ਲੋਕਾਂ  ਨੇ ਆਪਣੇ ਪਲਾਟ ਜਾਂ ਮਕਾਨ ਵੇਚਣੇ ਹਨ ਸਿਰਫ ਉਨ੍ਹਾਂ ਨੂੰ ਹੀ ਐੱਨ. ਓ. ਸੀ. ਦੀ ਜ਼ਰੂਰਤ ਹੈ। ਬਾਜਵਾ ਨੇ ਪ੍ਰਦੇਸ਼ ਦੀ ਜਨਤਾ ਨੂੰ ਕਿਹਾ ਹੈ ਕਿ ਘਬਰਾਉਣ ਦੀ ਲੋੜ ਨਹੀਂ ਹੈ ਸਿਰਫ 3 ਸਾਲ ਤਕ ਇੰਤਜ਼ਾਰ ਕਰੋ ਅਤੇ ਸਾਡੀ ਸਰਕਾਰ ਆਉਂਦਿਆਂ ਹੀ ਸਾਰੇ ਨਾਜਾਇਜ਼  ਟੈਕਸ   ਮੁਆਫ  ਕੀਤੇ ਜਾਣਗੇ। ਉਨ੍ਹਾਂ ਇਹ ਵੀ ਕਿਹਾ ਕਿ ਜੇਕਰ ਜੇਲ ਜਾਣਾ ਪਿਆ ਤਾਂ ਜਨਤਾ ਦੀ ਥਾਂ ਮੈਂ ਅਤੇ ਮੇਰੀ ਪਾਰਟੀ ਦੇ ਵਰਕਰ ਵੀ ਜੇਲ ਜਾਣਗੇ।
ਪ੍ਰਤਾਪ ਸਿੰਘ ਬਾਜਵਾ ਨੇ ਕਿਹਾ ਕਿ ਸਰਕਾਰ ਨੇ ਪਹਿਲਾਂ ਕਾਲੋਨਾਈਜ਼ਰਾਂ ਨੂੰ ਜੇਲ ਦਾ ਡਰ ਦਿਖਾ ਕੇ ਧਮਕਾਇਆ ਤੇ ਫਿਰ ਉਨ੍ਹਾਂ ਨਾਲ ਸੌਦਾ ਕਰ ਲਿਆ। ਹੁਣ ਇਹ ਸਰਕਾਰ ਗਰੀਬ ਪਲਾਟ ਹੋਲਡਰਾਂ ਕੋਲੋਂ ਕਰੋੜਾਂ ਰੁਪਏ ਇਕੱਠੇ ਕਰਨਾ ਚਾਹੁੰਦੀ ਹੈ। ਕਾਂਗਰਸ ਆਮ ਜਨਤਾ  ਦੇ ਨਾਲ ਖੜ੍ਹੀ ਹੋ ਕੇ ਸਰਕਾਰ ਦੇ ਇਸ ਲੋਕ ਮਾਰੂ ਮਨਸੂਬੇ  ਨੂੰ ਪੂਰਾ  ਨਹੀਂ ਹੋਣ     ਦੇਵੇਗੀ । ਬਾਜਵਾ ਨੇ ਸਰਕਾਰ ਨੂੰ ਸਵਾਲ ਕੀਤਾ ਕਿ ਜਿਨ੍ਹਾਂ ਕਾਲੋਨੀਆਂ ‘ਚ ਸੜਕਾਂ ਬਣ ਚੁੱਕੀਆਂ ਹਨ ਸਟ੍ਰੀਟ ਲਾਈਟਾਂ ਲੱਗ ਚੁੱਕੀਆਂ ਹਨ , ਨਕਸ਼ੇ ਪਾਸ ਹੋ ਚੁੱਕੇ ਹਨ ਅਤੇ ਲੋਕ ਡਿਵੈਲਪਮੈਂਟ ਚਾਰਜਿਜ਼ ਜਮ੍ਹਾ ਕਰਵਾ ਚੁੱਕੇ ਹਨ ਉਹ ਕਾਲੋਨੀਆਂ ਨਾਜਾਇਜ਼ ਕਿਵੇਂ ਮੰਨੀਆਂ ਜਾ ਸਕਦੀਆਂ ਹਨ? ਬਾਜਵਾ ਨੇ ਕਿਹਾ ਕਿ ਕਾਲੋਨੀਆਂ ਦੇ ਅੰਦਰ ਕਿਸੇ ਕੋਲ ਵੀ 7-8 ਮਰਲੇ ਤੋਂ ਛੋਟਾ ਪਲਾਟ ਨਹੀਂ ਹੈ, ਇਸ ਹਿਸਾਬ ਨਾਲ ਪਲਾਟ ਹੋਲਡਰਾਂ ਨੂੰ 40,000 ਤੋਂ ਲੈ ਕੇ 2 ਲੱਖ ਤਕ ਦੀ ਰਕਮ ਜਮ੍ਹਾ ਕਰਾਉਣੀ ਪਵੇਗੀ ਜੋ ਕਿ ਬਰਦਾਸ਼ਤ ਕਰਨ ਯੋਗ ਨਹੀਂ ਹੈ। ਕਾਂਗਰਸ ਇਸ ਗੱਲ ਦਾ ਡਟ ਕੇ ਵਿਰੋਧ ਕਰੇਗੀ।