ਚੋਣ ਦੰਗਲ ‘ਚ ਹੱਥ ਅਜਮਾਉਣ ਦਾ ਚਾਹਵਾਨ ਬਣਿਆ ਰਾਜੋਆਣਾ

www.sabblok.blogspot.com

 

ਪਟਿਆਲਾ, (ਬਲਜਿੰਦਰ) – ਸਾਬਕਾ ਮੁੱਖ ਮੰਤਰੀ ਬੇਅੰਤ ਸਿੰਘ ਦੇ ਕਤਲ ਦੇ ਮਾਮਲੇ ‘ਚ ਫਾਂਸੀ ਦੀ ਸਜ਼ਾ ਭੁਗਤ ਰਹੇ ਬਲਵੰਤ ਸਿੰਘ ਰਾਜੋਆਣਾ ਨੇ ਅੱਜ ਪਟਿਆਲਾ ਜਾਂ ਆਨੰਦਪੁਰ ਸਾਹਿਬ ਤੋਂ ਆਪਣਾ ਉੁਮੀਦਵਾਰ ਖੜ੍ਹਾ ਕਰਨ ਦਾ ਐਲਾਨ ਕੀਤਾ ਹੈ। ਇਥੇ ਕੇਂਦਰੀ ਜੇਲ ਪਟਿਆਲਾ ਦੀ ਕੋਠੀ ਨੰ. 16 ਵਿਚ ਬੰਦ ਰਾਜੋਆਣਾ ਨੇ ਆਪਣੀ ਭੈਣ ਕਮਲਜੀਤ ਕੌਰ ਰਾਹੀਂ ਜਾਰੀ ਕੀਤੇ ਬਿਆਨ ‘ਚ ਆਪਣੀ ਇਹ ਇੱਛਾ ਦਾ ਖੁਲਾਸਾ ਕੀਤਾ ਹੈ। ਆਪਣੀ ਇੱਛਾ ਦੇ ਹੱਕ ਵਿਚ ਤਰਕ ਪੇਸ਼ ਕਰਦਿਆਂ ਰਾਜੋਆਣਾ ਨੇ ਪਟਿਆਲਾ ਹਲਕੇ ਬਾਰੇ ਆਪਣੀ ਦਲੀਲ ਪੇਸ਼ ਕਰਦਿਆਂ ਕਿਹਾ ਕਿ ਪਟਿਆਲਾ ਲੋਕ ਸਭਾ ਹਲਕਾ ਪਿਛਲੇ ਕਾਫੀ ਸਮੇਂ ਤੋਂ ਮੋਤੀ ਮਹਿਲ ਦੇ ਕਬਜ਼ੇ ‘ਚ ਹੈ। ਇਹ ਮੋਤੀ ਮਹਿਲ ਖਾਲਸਾ ਪੰਥ ਨਾਲ ਕੀਤੀਆਂ ਧੋਖੇਬਾਜ਼ੀਆਂ ਅਤੇ ਬੇਵਫਾਈਆਂ ਦਾ ਪ੍ਰਤੀਕ ਅਤੇ ਕੇਂਦਰ ਬਿੰਦੂ ਹੈ, ਜਦੋਂਕਿ ਆਨੰਦਪੁਰ ਸਾਹਿਬ ਹਲਕੇ ਦੀ ਗੱਲ ਕਰਦਿਆਂ ਰਾਜੋਆਣਾ ਨੇ ਆਖਿਆ ਕਿ ਆਨੰਦਪੁਰ ਸਾਹਿਬ ਦੀ ਸੀਟ ਤੋਂ ਕਾਤਲਾਂ ਦਾ ਜਿੱਤਣਾ ਇਸ ਪਵਿੱਤਰ ਧਰਤੀ ਦਾ ਅਤੇ ਖਾਲਸਈ ਭਾਵਨਾਵਾਂ ਦਾ ਅਪਮਾਨ ਹੈ। ਇਨ੍ਹਾਂ ਦੋ ਲੋਕ ਸਭਾ ਸੀਟਾਂ ਵਿਚੋਂ ਕਿਸੇ ਇਕ ‘ਤੇ ਉਹ ਆਪਣਾ ਉਮੀਦਵਾਰ ਖੜ੍ਹਾ ਕਰਨਾ ਚਾਹੁੰਦਾ ਹੈ।

ਰਾਜੋਆਣਾ ਦੇ ਇਸ ਐਲਾਨ ਦੀ ਖਬਰ ਜੰਗਲ ਦੀ ਅੱਗ ਵਾਂਗ ਫੈਲ ਗਈ। ਇਸ ਫੈਸਲੇ ਬਾਰੇ ਕਈ ਤਰ੍ਹਾਂ ਦੀਆਂ ਕਿਆਸ ਅਰਾਈਆਂ ਸ਼ੁਰੂ ਹੋ ਗਈਆਂ ਪਰ ਦਿਲਚਸਪੀ ਵਾਲੀ ਗੱਲ ਇਹ ਹੈ ਕਿ ਰਾਜੋਆਣਾ ਨੇ ਆਪਣੇ ਬਿਆਨ ਵਿਚ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਇਹ ਚੋਣ ਕਿਸੇ ਹੋਰ ਨੂੰ ਜਿਤਾਉਣ ਜਾਂ ਹਰਾਉਣ ਲਈ ਨਹੀਂ, ਸਗੋਂ ਇਸ ਧਰਤੀ ਮਾਂ ਦੇ ਮਾਣ-ਸਨਮਾਨ ਲਈ ਲੜੀ ਜਾਵੇਗੀ। ਉਂਝ ਰਾਜੋਆਣਾ ਨੇ ਇਹ ਵੀ ਸਪੱਸ਼ਟ ਕੀਤਾ ਹੈ ਕਿ ਅੰਤਿਮ ਫੈਸਲਾ ਸੋਚ-ਵਿਚਾਰ ਤੋਂ ਬਾਅਦ ਹੀ ਲਿਆ ਜਾਵੇਗਾ।