ਭਾਜਪਾ ਪ੍ਰਧਾਨ ਦੇ ਸਮਰਥਕਾਂ ਨੇ ਫਲੈਕਸਾਂ ਨਾਲ ਭਰਿਆ ਸ਼ਹਿਰ

www.sabblok.blogspot.com

ਪਟਿਆਲਾ 24 ਮਈ (ਪੀ. ਐਮ. ਆਈ.):- ਭਾਰਤੀ ਜਨਤਾ ਪਾਰਟੀ ਦੇ ਨਵੇਂ ਬਣੇ ਸ਼ਹਿਰੀ ਪ੍ਰਧਾਨ ਅਨਿਲ ਬਜਾਜ ਦੇ ਪਟਿਆਲਾ ਜ਼ਿਲਾ ਸ਼ਹਿਰੀ ਪ੍ਰਧਾਨ ਬਣਨ 'ਤੇ ਉਨ੍ਹਾਂ ਦੇ ਸਮਰਥਕਾਂ ਵਲੋਂ ਸ਼ਹਿਰ ਫਲੈਕਸਾਂ ਨਾਲ ਭਰ ਦਿੱਤਾ। ਇੱਥੋਂ ਤਕ ਕਿ ਨਗਰ ਨਿਗਮ ਦੀ ਆਪਣੀ ਬਿਲਡਿੰਗ ਵੀ ਨਹੀਂ ਛੱਡੀ। ਸ਼ਹਿਰ ਦਾ ਕਈ ਵੀ ਚੌਕ ਦੇਖੋ ਤਾਂ ਅਨਿਲ ਬਜਾਜ ਨੂੰ ਵਧਾਈ ਮਿਲਦੀ ਨਜ਼ਰ ਆ ਰਹੀ ਹੈ ਅਤੇ ਦੂਜੇ ਪਾਸੇ ਕਈ ਦਿਨ ਬੀਤ ਜਾਣ ਤੋਂ ਬਾਅਦ ਵੀ ਨਗਰ ਨਿਗਮ ਕਿਸੇ ਤਰ੍ਹਾਂ ਦੀ ਕੋਈ ਕਾਰਵਾਈ ਕਰਨ ਲਈ ਤਿਆਰ ਹੀ ਨਹੀਂ ਹੈ। ਸਾਬਕਾ ਸੀਨੀਅਰ ਡਿਪਟੀ ਮੇਅਰ ਦੇ ਪ੍ਰਧਾਨ ਬਣਨ ਤੋਂ ਬਾਅਦ ਜਿਹੜੀਆਂ ਥਾਵਾਂ 'ਤੇ ਫਲੈਕਸਾਂ ਲਗਾਈਆਂ ਗਈਆਂ ਹਨ, ਉਥੋਂ ਨਗਰ ਨਿਗਮ ਨੂੰ ਰੋਜ਼ਾਨਾ ਦਾ ਹਜ਼ਾਰਾਂ ਰੁਪਏ ਕਿਰਾਇਆ ਆ ਸਕਦਾ ਹੈ ਪਰ ਸੱਤਾ ਦੀ ਧੋਂਸ ਵਿਚ ਅਨਿਲ ਬਜਾਜ ਅਤੇ ਉਨ੍ਹਾਂ ਦੇ ਸਮਰਥਕਾਂ ਵਲੋਂ ਖੁੱਲ੍ਹ ਕੇ ਜਨਤਕ ਥਾਵਾਂ 'ਤੇ ਫਲੈਕਸਾਂ ਲਗਾਈਆਂ ਜਾ ਰਹੀਆਂ ਹਨ। ਜਿਹੜੀਆਂ ਥਾਵਾਂ 'ਤੇ ਫਲੈਕਸਾਂ ਲਗਾਈਆਂ ਗਈਆਂ ਹਨ, ਉਨ੍ਹਾਂ ਵਿਚ ਸ਼ੇਰਾਂਵਾਲਾ ਗੇਟ, ਫੁਹਾਰਾ ਚੌਕ ਅਤੇ ਲੀਲਾ ਭਵਨ ਵਰਗੀਆਂ ਪ੍ਰਮੁੱਖ ਥਾਵਾਂ ਵੀ ਸ਼ਾਮਲ ਹਨ।  ਕਿਉਂ ਅੱਖਾਂ ਬੰਦ ਕਰਕੇ ਬੈਠੇ ਹੈ ਨਗਰ ਨਿਗਮ- ਸ਼ਹਿਰ ਵਿਚ ਇੰਨੀਆਂ ਜ਼ਿਆਦਾ ਰਾਜਨੀਤਿਕ ਫਲੈਕਸਾਂ ਜੋ ਕਿ ਪ੍ਰਮੁੱਖ ਚੌਕਾਂ ਵਿਚ ਲੱਗੀਆਂ ਹੋਈਆਂ ਹਨ, ਦੇ ਪ੍ਰਤੀ ਨਗਰ ਨਿਗਮ ਕਿਉਂ ਚੁੱਪ ਕਰਕੇ ਬੈਠਾ ਹੋਇਆ ਹੈ, ਕਿ ਮੇਅਰ ਅਤੇ ਕਮਿਸ਼ਨਰ ਨੂੰ ਇਹ ਫਲੈਕਸਾਂ ਦਿਖਾਈ ਨਹੀਂ ਦਿੰਦੀਆਂ ਜਾਂ ਫੇਰ ਉਹ ਦੇਖ ਦੇ ਅਣਦੇਖਿਆ ਕਰ ਦਿੰਦੇ ਹਨ।  ਕੀ ਕਹਿੰਦੇ ਹਨ ਅਨਿਲ ਬਜਾਜ- ਇਸ ਸਬੰਧੀ ਪੁੱਛੇ ਜਾਣ 'ਤੇ ਭਾਜਪਾ ਦੇ ਨਵੇਂ ਬਣੇ ਪ੍ਰਧਾਨ ਅਨਿਲ ਬਜਾਜ ਦਾ ਕਹਿਣਾ ਹੈ ਕਿ ਉਨ੍ਹਾਂ ਵਲੋਂ ਕਿਸੇ ਨੂੰ ਵੀ ਫਲੈਕਸਾਂ ਲਗਾਉਣ ਲਈ ਨਹੀਂ ਕਿਹਾ ਗਿਆ ਪਰ ਜੇਕਰ ਕੋਈ ਵਰਕਰ ਜਾਂ ਅਹੁਦੇਦਾਰ ਲਗਾਉਂਦਾ ਹੈ ਤਾਂ ਉਹ ਉਨ੍ਹਾਂ ਨੂੰ ਕਿਸ ਤਰ੍ਹਾਂ ਰੋਕ ਸਕਦੇ ਹਨ। ਉਨ੍ਹਾਂ ਕਿਹਾ ਕਿ ਜਿਥੋਂ ਤਕ ਨਗਰ ਨਿਗਮ ਦਾ ਸਵਾਲ ਹੈ ਤਾਂ ਸਾਰੇ ਰਾਜਨੀਤਿਕ ਆਗੂਆਂ ਦੀਆਂ ਲੱਗ ਰਹੀਆਂ ਹਨ ਤਾਂ ਤੁਸੀਂ ਸਿਰਫ ਉਨ੍ਹਾਂ 'ਤੇ ਸਵਾਲ ਕਿਉਂ ਉਠਾ ਰਹੇ ਹੋ।