ਪਾਕਿਸਤਾਨ ਲਈ ਜਾਸੂਸੀ ਕਰਦਾ ਕਾਬੂ

ਅੰਮ੍ਰਿਤਸਰ, 25 ਸਤੰਬਰ -ਪਾਕਿਸਤਾਨ ਲਈ ਜਾਸੂਸੀ ਕਰਦੇ ਇਕ ਭਾਰਤੀ ਨਾਗਰਿਕ ਨੂੰ ਰਾਜ ਵਿਸ਼ੇਸ਼ ਅਪ੍ਰੇਸ਼ਨ ਸੈਲ ਦੀ ਪੁਲਿਸ ਵੱਲੋਂ ਕਾਬੂ ਕੀਤਾ ਗਿਆ ਹੈ। ਬੇਰੁਜ਼ਗਾਰੀ ਦਾ ਝੰਬਿਆ ਇਹ ਨੌਜਵਾਨ ਦੇਸ਼ ਦੇ ਗੁਪਤ ਭੇਦ ਦੁਸ਼ਮਣ ਦੇਸ਼ ਨੂੰ ਦੇ ਕੇ ਰੋਜ਼ਗਾਰ ਦਾ ਜੁਗਾੜ ਚਲਾ ਰਿਹਾ ਸੀ। ਸੈਲ ਨੇ ਉਸ ਪਾਸੋਂ ਪਾਕਿਸਤਾਨੀ ਸਿਮ ਕਾਰਡ, ਫੌਜੀ ਨਕਸ਼ੇ, ਵਰਜਿਤ ਖੇਤਰਾਂ ਦੀਆਂ ਫੋਟੋਆਂ ਅਤੇ ਫੌਜੀ ਛਾਉਣੀਆਂ ਬਾਰੇ ਸਕੈਚ ਆਦਿ ਵੀ ਬਰਾਮਦ ਕੀਤੇ ਹਨ। ਸੈਲ ਵੱਲੋਂ ਗ੍ਰਿਫ਼ਤਾਰ ਕੀਤੇ ਉਕਤ ਵਿਅਕਤੀ ਦੀ ਸ਼ਨਾਖਤ ਤਰਵਿੰਦਰ ਸਿੰਘ ਪੁੱਤਰ ਗੁਰਨਾਮ ਸਿੰਘ ਵਾਸੀ ਪਿੰਡ ਕੱਕੜ ਡਰੇਨ ਥਾਣਾ ਲੋਪੋਕੇ ਜ਼ਿਲ੍ਹਾ ਅੰਮ੍ਰਿਤਸਰ ਵਜੋਂ ਹੋਈ ਹੈ। ਉਸਨੂੰ ਵਾਹਗਾ ਸਰਹੱਦ ਨੇੜੇ ਅਟਾਰੀ ਰੋਡ 'ਤੇ ਗ੍ਰਿਫ਼ਤਾਰ ਕੀਤਾ ਗਿਆ। ਸੈਲ ਵੱਲੋਂ ਜਾਰੀ ਪ੍ਰੈਸ ਬਿਆਨ ਅਨੁਸਾਰ ਹੁਣ ਤੱਕ ਦੀ ਮੁੱਢਲੀ ਪੁੱਛਗਿੱਛ ਤੋਂ ਇਹ ਪਤਾ ਲੱਗਾ ਹੈ ਕਿ ਉਹ ਬੇਰੁਜ਼ਗਾਰ ਨੌਜਵਾਨ ਸੀ ਜੋ 2010 'ਚ ਰੋਜ਼ਗਾਰ ਦੀ ਭਾਲ 'ਚ ਦੁਬਈ ਗਿਆ ਤੇ ਉਥੋਂ ਇਕ ਸਾਲ ਬਾਅਦ ਵਾਪਸ ਪਰਤ ਆਇਆ। 2013 'ਚ ਉਹ ਜਥੇ ਨਾਲ ਪਾਕਿਸਤਾਨ ਗਿਆ ਤੇ ਉਥੇ 10 ਦਿਨ ਗੁਜ਼ਾਰੇ। ਇਸ ਸਮੇਂ ਦੌਰਾਨ ਪਾਕਿਸਤਾਨ ਅਧਿਕਾਰੀ ਜਿਨ੍ਹਾਂ ਦਾ ਕੋਡ ਨਾਂਅ 'ਰਾਓ ਸਾਹਿਬ' ਨੂੰ ਮਿਲਿਆ ਜਿਸ ਨੇ ਉਸਨੂੰ ਪੈਸਿਆਂ ਦਾ ਲਾਲਚ ਦਿੱਤਾ ਤੇ ਇਕ ਪਾਕਿਸਤਾਨੀ ਸਿਮ ਉਸਦੇ ਹਵਾਲੇ ਕਰਦਿਆਂ ਖੁਫੀਆ ਭੇਦ ਪਾਕਿਸਤਾਨ ਏਜੰਸੀਆਂ ਨੂੰ ਦੇਣ ਦੀ ਤਾਕੀਦ ਕੀਤੀ। ਰਾਜ ਵਿਸ਼ੇਸ਼ ਅਪ੍ਰੇਸ਼ਨ ਸੈਲ ਦੇ ਡੀ. ਐਸ. ਪੀ. ਸ੍ਰੀ ਅਸ਼ੋਕ ਕੁਮਾਰ ਮੁਤਾਬਕ ਉਸਦਾ ਕੰਮ ਅੰਮ੍ਰਿਤਸਰ ਤੇ ਡੇਰਾ ਬਾਬਾ ਨਾਨਕ ਦੀਆਂ ਫੌਜੀ ਗਤੀਵਿਧੀਆਂ 'ਤੇ ਨਜ਼ਰ ਰੱਖਣਾ, ਭਾਰਤ ਸਰਹੱਦ 'ਤੇ ਬਣ ਰਹੇ ਨਵੇਂ ਫੌਜੀ ਬੰਕਰਾਂ, ਸੈਨਿਕ ਵਾਹਨਾਂ ਦੀਆਂ ਤਸਵੀਰਾਂ ਤੇ ਉਨ੍ਹਾਂ ਦੇ ਚਿੰਨ੍ਹ, ਸਿਖਲਾਈ ਕੇਂਦਰਾਂ ਤੇ ਵਾਹਗਾ ਸਰਹੱਦ 'ਤੇ ਨਵੀਂ ਉਸਾਰੀ ਦੀ ਜਾਣਕਾਰੀ ਪਾਕਿਸਤਾਨ ਨੂੰ ਭੇਜਣਾ ਸ਼ਾਮਿਲ ਸੀ। ਗ੍ਰਿਫ਼ਤਾਰ ਕੀਤੇ ਵਿਕਅਤੀ ਨੂੰ ਪੁਲਿਸ ਨੇ ਕੋਰਟ ਵਿਚ ਪੇਸ਼ ਕਰ ਰਹੀ ਹੈ ਤਾਂ ਜੋ ਉਸ ਤੋਂ ਹੋਰ ਪੁੱਛਗਿੱਛ ਕੀਤੀ ਜਾ ਸਕੇ