ਸੀਰੀਆ ਵਿੱਚ ਅਣਮਨੁੱਖੀ ਘਟਨਾਵਾਂ 1300 ਤੋਂ ਵੱਧ ਵਿਅਕਤੀ ਮਾਰੇ, ਯੂ ਐਨ ਓ ਨੇ ਹੰਗਾਮੀ ਮੀਟਿੰਗ ਸੱਦੀ

www.sabblok.blogspot.com

ਅਮਾਨ : ਰਾਸ਼ਟਰਪਤੀ ਅਲ-ਅਸਦ ਦੀਆਂ ਫੋਰਸਾਂ ਵੱਲੋਂ ਦਮਸਕਸ ਨੇੜੇ ਬਾਗੀਆਂ ਦੇ ਕਬਜ਼ੇ ਹੇਠਲੇ ਖੇਤਰਾਂ ਵਿਚ ਰਸਾਇਣਕ ਹਥਿਆਰਾਂ ਨਾਲ ਕੀਤੀ ਗਈ ਬੰਬਾਰੀ ਵਿਚ 1300 ਤੋਂ ਵਧ ਵਿਅਕਤੀ ਮਾਰੇ ਗਏ ਹਨ । ਵਿਰੋਧੀ ਧਿਰ ਨੇ ਇਸ ਨੂੰ ਕਤਲੇਆਮ ਕਰਾਰ ਦਿੰਦਿਆਂ ਕੌਮਾਂਤਰੀ ਦਖਲਅੰਦਾਜ਼ੀ ਦੀ ਮੰਗ ਕੀਤੀ ਹੈ । ਬਰਤਾਨੀਆ ਨੇ ਕਿਹਾ ਹੈ ਕਿ ਉਹ ਰਸਾਇਣਕ ਹਥਿਆਰਾਂ ਦੇ ਕਥਿਤ ਹਮਲੇ ਦੀ ਜਾਂਚ ਦਾ ਮਾਮਲਾ ਉਠਾਵੇਗਾ ਜਿਸ ਬਾਰੇ ਫੌਰੀ ਪੁਸ਼ਟੀ ਨਹੀਂ ਹੋ ਸਕੀ । ਦਮਸਕਸ ਸਾਸ਼ਨ ਨੇ ਰਸਾਇਣਕ ਹਮਲੇ ਨੂੰ ਸਿਰੇ ਤੋਂ ਖਾਰਜ ਕਰ ਦਿੱਤਾ ਹੈ । ਹਾਲਾਂ ਕਿ ਸੀਰੀਆ ਦੀ ਕੌਮੀ ਕੁਲੀਸ਼ਨ ਨੇ ਮੌਤਾਂ ਦੀ ਗਿਣਤੀ 1300 ਦੱਸੀ ਹੈ ਪਰ ਇਸ ਤੋਂ ਪਹਿਲਾਂ ਬਰਤਾਨੀਆ ਦੇ ਇਕ ਨਿਗਰਾਨ ਗਰੁੱਪ ਨੇ ਕਿਹਾ ਸੀ ਕਿ ਘੱਟੋ-ਘੱਟ 100 ਲੋਕ ਮਾਰੇ ਗਏ ਹਨ ਤੇ ਮੌਤਾਂ ਦੀ ਗਿਣਤੀ ਵਧ ਸਕਦੀ ਹੈ । ਮਨੁੱਖੀ ਅਧਿਕਾਰਾਂ ਬਾਰੇ ਸੀਰੀਅਨ ਨਿਗਰਾਨ ਗਰੁੱਪ ਨੇ ਕਿਹਾ ਕਿ ਬੰਬਾਰੀ ਅਜੇ ਵੀ ਜਾਰੀ ਹੈ ਇਸ ਲਈ ਯਕੀਨਨ ਮੌਤਾਂ ਦੀ ਗਿਣਤੀ ਵਧੇਗੀ । ਸਮਾਜਿਕ ਕਾਰਕੁਨਾਂ ਅਨਸਾਰ ਅਸਦ ਦੀਆਂ ਫੋਰਸਾਂ ਨੇ ਘੌਟਾ ਖੇਤਰ ਵਿਚ ਏਨ ਤਰਮਾ, ਜ਼ਮਲਕਾ ਤੇ ਜੋਬਰ ਵਿਖੇ ਰਸਾਇਣਕ ਬੰਬ ਸੁੱਟੇ ਜਿਨ੍ਹਾਂ ਨਾਲ ਸੈਂਕੜੇ ਵਿਅਕਤੀ ਮਾਰੇ ਗਏ । ਡੂਮਾ ਹੰਗਾਮੀ ਕੇਂਦਰ ਵਿਖੇ ਤਾਇਨਾਤ ਇਕ ਨਰਸ ਨੇ ਦੱਸਿਆ ਕਿ ਮਿ੍ਤਕਾਂ ਵਿਚ ਜਿਆਦਾਤਰ ਔਰਤਾਂ ਤੇ ਬਚੇ ਹਨ । ਉਸ ਨੇ ਦੱਸਿਆ ਕਿ ਮਿ੍ਤਕਾਂ ਦੀਆਂ ਲਾਸ਼ਾਂ ਤੋਂ ਜਿਸ ਤਰਾਂ ਦੇ ਲੱਛਣ ਮਿਲੇ ਹਨ ਉਸ ਤੋਂ ਲੱਗਦਾ ਹੈ ਕਿ ਇਹ ਵਿਅਕਤੀ ''ਨਰਵ ਗੈਸ'' ਦਾ ਸ਼ਿਕਾਰ ਹੋਏ ਹਨ । ਸੀਰੀਆ ਅਧਿਕਾਰੀਆਂ ਨੇ ਫੌਜ ਵੱਲੋਂ ਰਸਾਇਣਕ ਹਥਿਆਰ ਵਰਤਣ ਤੋਂ ਇਨਕਾਰ ਕੀਤਾ ਹੈ । ਸਰਕਾਰ ਦੀ ਮਾਲਕੀ ਵਾਲੀ ਨਿਊਜ਼ ਏਜੰਸੀ ਸਾਨਾ ਨੇ ਕਿਹਾ ਹੈ ਕਿ ''ਘੌਟਾ ਵਿਚ ਰਸਾਇਣਕ ਹਥਿਆਰ ਵਰਤਣ ਦੀਆਂ ਰਿਪੋਰਟਾਂ ਮੁੰਕਮਲ ਤੌਰ 'ਤੇ ਝੂਠੀਆਂ ਹਨ । ਇਹ ਯੂ।ਐਨ ਜਾਂਚ ਕਮਿਸ਼ਨ ਦੇ ਮਿਸ਼ਨ ਨੂੰ ਰੋਕਣ ਦੀ ਇਕ ਕੋਸ਼ਿਸ਼ ਹੈ ।'' ਦੂਸਰੇ ਪਾਸੇ ਕੌਮੀ ਕੁਲੀਸ਼ਨ ਦੇ ਆਗੂ ਅਹਿਮਦ ਅਲ-ਜਰਬਾ ਨੇ ਬੰਬਾਰੀ ਦੀ ਨਿੰਦਾ ਕਰਦਿਆਂ ਸੰਯੁਕਤ ਰਾਸ਼ਟਰ ਸੁਰਖਿਆ ਪ੍ਰੀਸ਼ਦ ਦੀ ਫੌਰਨ ਮੀਟਿੰਗ ਸੱਦਣ ਦੀ ਮੰਗ ਕੀਤੀ ਹੈ । ਸੀਰੀਆ ਪਿੱਛਲੇ 2 ਸਾਲ ਤੋਂ ਚਲੇ ਆਉਂਦੇ ਟਕਰਾਅ ਦੌਰਾਨ ਰਸਾਇਣਕ ਹਥਿਆਰਾਂ ਦੀ ਵਰਤੋਂ ਕਰਨ ਤੋਂ ਇਨਕਾਰ ਕਰਦਾ ਆ ਰਿਹਾ ਹੈ ਤੇ ਉਹ ਉਲਟਾ ਬਾਗੀਆਂ ਉਪਰ ਇਹ ਹਥਿਆਰ ਵਰਤਣ ਦੇ ਦੋਸ਼ ਲਾਉਂਦਾ ਰਿਹਾ ਹੈ ।

ਲਾਸ਼ਾਂ 'ਤੇ ਜ਼ਖਮ ਦੇ ਨਿਸ਼ਾਨ ਨਹੀਂ
ਇਕ ਵੀਡੀਓ ਫਿਲਮ ਵਿਚ ਡਾਕਟਰ ਲੋਕਾਂ ਦਾ ਇਲਾਜ ਕਰਦੇ ਨਜ਼ਰ ਆ ਰਹੇ ਹਨ । ਦਰਜਨਾਂ ਲਾਸ਼ਾਂ ਇਕ ਕਲੀਨਿਕ ਦੇ ਫਰਸ਼ 'ਤੇ ਪਈਆਂ ਹਨ ਪਰ ਕਿਸੇ ਦੇ ਵੀ ਜ਼ਖਮ ਨਹੀਂ ਹੈ । ਹਮਲਾ ਤੜਕੇ 3 ਵਜੇ ਦੇ ਕਰੀਬ ਹੋਇਆ । ਮਾਰੇ ਗਏ ਜ਼ਿਆਦਾਤਰ ਵਿਅਕਤੀ ਆਪਣੇ ਘਰਾਂ ਵਿਚ ਹੀ ਸਨ ।